المجله
السلام عليكم ورحمة الله وبركاته
كلنا
نفسنا نقدم حاجه لبلدنا وعندنا الطاقه للعمل حاليا وبما اننا احنا اللى
نقدر نغير بلدنا للاحسن واكيد الكل معايا فى اننا مش عاوزين نعيش بالمعونات
لانها بتخلينا نتنازل عن حاجات كتير ونسكت عن حاجات اكتر ومقابلها سبنا
ناس تموت فى فلسطين وقدمنا الغاز على طبق من ذهب وسكتنا على حاجات كتير جدا
بس احنا خلاص مش هنسكت تانى وكمان عشان احنا لسه قادرين نشتغل ونتعب عشان
بلدنا طبعا الكل هيقول واحنا هنعمل ايه والكلام المعتاد سماعه ده ولو كلنا
قولنا كده يبقى كلنا هنفضل مكانا ومش هنتحرك ابدا وهنفضل عايشيين على
معونات بتخلينا نطاطى راسنا لناس احقر من اننا حتى نبصلهم وكمان انا مش
مستعده احنى راسى الا لربى فى صلاتى فقط وكمان المعونات دى نتيجه لان نسبه
الفقراء ومن هم تحت خط الفقر كتير جدا عندنا فى مصر وده نتيجة وجود نسبه
صغيره بتتحكم فى نسبه كبيره من ثروات البلد دى ومش بس الناس اللى محبوسين
والكبار دول هم اللى معاهم فلوس بالعكس فى ناس برضو معاها كتير وبتكسبها
بالحلال احنا بقى دورنا اننا هناخد من ده وندى لده يعنى هننشأ جمعيات خيريه
صغيره فى بلد كل حد فينا ونتكلم مع الناس القادره على المسانده والتبرع
ونعمل حاجات للناس اللى على قدها يعنى وبمعنى اصح
جمعيات خيريه هدفها
انها تخلى مصر تعدى من وجود نسبه كبيره تحت خط الفقر وكلنا نساعد بعض فى
ناس كتير مستعده تقدم مساندات بس مش لاقيه طريقه احنا بقى هنكون همزة الوصل
بينهم
طبعا كتير هيقول احنا اللى هنقدر نغير البلد واحنا واحنا .......طبعا احنا اللى هنقدر لاننا هنقوم بالتالى
اولا هننشأ جمعيات خيريه فى كل بلد احنا فيها
ثانيا كل واحد فينا هيدرس بلده وظروفها والناس اللى تستحق اللى هنجمعه
ثالثا هنجمع اللى نقدر عليه من مال وملابس ومواد تموينيه
رابعا
الملابس كلها هتتجمع وتنظف وبعدها هنعمل بيها زى معرض صغير قبل العيد على
طول وهيكون اسعارها رمزيه جدا لعدم احراج الناس اللى هتييجى
خامسا المواد التموينيه هنجمعها ونعمل منها كراتين كل كرتونه تحتوى على جميع انواع المواد التموينيه وتوزع قبل شهر رمضان
سادسا طبعا مش كل واحد هيعمل كل ده لوحدوا اكيد كل واحد فينا ليه اصحاب فى بلده كتير هتجمعوهم وتكونوا الجمعيه الخاصه بيكم
سابعا الجمعيات دى هتتجمع كلها تحت جمعيه واحده واحنا هنكون اعضائها
ثامنا هنعمل حمله للتبرع بالمال وهنلف على رجال الاعمال الموجود فى بلدنا او الناس القادره على التبرع
تاسعا
المال اللى هيتم تجميعه والمال اللى هنجمعه من المعارض بتاعت الملابس
هتتجمع كلها فى المقر الرئيسى او الجمعيه الرئيسيه وهنعمل بيها مشروع خيرى
اخر ممكن مستشفى صغيره او ملجأ او اى شئ من هذا القبيل وهيكون فى بلد فى
منتصف بلادنا كلها بحيث تخدم جميع البلاد اللى احنا منها او لو قدرنا نعمل
المشروع فى كل بلد هيكون افضل وده حسب التبرعات
عاشرا واخيرا وده الاهم
انا عارفه ان كل اللى هيقرا الكلام ده هيقول انه كتير وصعب يتنفذ ومش هينفع
بس لازم نفهم اننا نقدر نعمل كتير ومش لازم نستهون بنفسنا وبمقدرتنا على
عمل معين وكفايه نيتكم للعمل وبعدها ان شاء الله هيتم التنفيذ
ملحوظه
انا مش عاوزه ليك وتعليق وبس انا عاوزه مشاركه بجد وعمل مش كلام انا بدات
ادرس الموضوع فى القريه اللى انا عايشه فيها وهبدأ التنفيذ اتمنى انكم
تشاركوا معايا ومكنش لوحدى وجزاكم الله خيرا وربنا يوفقنا للخير واللى
موافق يشترك معايا يبلغنى وان شاء الله هنفذ فور موافقتكم بالتوفيق ان شاء
الله
